රගර් ක්‍රීඩක වසීම් තාජුඩීන්ගේ ඝාතනය සිදු වන විට අනුර විදානගමගේ නොහොත් කජ්ජා ප්‍රබල අමාත්‍යාංශයක රියැදුරෙක් ලෙස කටයුතු කරමින් සිට ඇතැයි අපරාධ පරීක්ෂණ දෙපාර්තමේන්තුව විසින් අනාවරණය කරගෙන ඇත.
එවකට ජනාධිපති මහින්ද රාජපක්ෂ මහතා යටතේ පැවති ප්‍රබල අමාත්‍යාංශයක ඔහු රියැදුරෙක් ලෙස සේවයේ නිරතව සිට ඇති බව ද අපරාධ පරීක්ෂණ දෙපාර්තමේන්තුව විසින් හෙළි කරගෙන තිබේ.
තාජුඩීන් ඝාතනය සහ කජ්ජා අතර යම් සම්බන්ධයක් ඇති බවට ප්‍රබල සැක මතු වන තොරතුරු ද මේ වන විට අපරාධ පරීක්ෂණ දෙපාර්තමේන්තුවේ විමර්ශකයන්ට ලැබී ඇත.
තාජුඩීන් ඝාතනය වූ දිනත්, ඊට පෙර සහ පසුදිනත් කජ්ජා රැඳී සිටි ස්ථාන සහ ඔහු දුරකතනයෙන් සම්බන්ධකම් පැවැත්වූ පුද්ගලයන් ආදී තොරතුරු ද මේ වන විට අපරාධ පරීක්ෂණ දෙපාර්තමේන්තුවේ විමර්ශකයෝ රැස්කරමින් සිටිති. ඒ සඳහා දුරකතන ජාල විශ්ලේෂණයක් ද මේ වන විට සිදු කරමින් ඇත්තේ කජ්ජා විසින් භාවිත කළ දුරකතන අංක ඔස්සේය.
රිය අනතුරකින් සිදු වූ මරණයක් ලෙස හැඟවෙන ලෙස තාජුඩීන් ඝාතනය කර නාරාහේන්පිට, මල්පාරේ සිරුර දමා ගොස් තිබුණේ මෝටර් රථයක් තුළයි. 2012 මැයි මස 17 වැනිදා අලුයම් කාලයේදීය. මෝටර් රථය ශාලිකා ක්‍රීඩාංගණයේ තාප්පයේ ගැටී ගිනි ගැනීමකට ද ලක්ව තිබුණි.
තාජුඩීන්ගේ සිරුර තිබෙන්නේ රියැදුරු අසුනට යාබද අසුනේය. මෝටර් රථයේ ආරක්ෂක බඳ පටිය පවා ඔහු දමාගෙන සිටි බවට සාක්ෂි කොළඹ දකුණ කොට්ඨාස අපරාධ ස්ථාන පරීක්ෂණාගාර (සොකෝ) නිලධාරීන් විසින් සොයා ගත්තේය. ඒ් අනුව මෝටර් රථය මියගොස් සිටි තාජුඩීන් විසින් පදවා නොතිබුණි. ඒත් ඒ වන විට මෝටර් රථය පැදවූ රියැදුරු එහි නොවීය.
තාජුඩීන් විසින් මෝටර් රථයේ රියැදුරු ලෙස ඒ මොහොතේ කටයුතු කර නැති බවට පැහැදිලි විමර්ශනාත්මක සාක්ෂි පැවතිය ද එකල කොළඹ නියෝජ්‍ය පොලිස්පති ධුරය දැරූ අනුර සේනානායක මහතා මාධ්‍ය හමුවකදී පවසන්නට වූයේ එය රිය අනතුරක් බවයි. තාජුඩීන් විසින් මෝටර් රථය පදවාගෙන පැමිණ ඇති බව ද ඔහු පවසන්නට විය. එම මාධ්‍ය හමුව එදින පෙරවරුවේ පවත්වන්නට යෙදුණේ කොළඹ නියෝජ්‍ය පොලිස්පති කාර්යාලයේදීය. තාජුඩීන් මෝටර් රථයේ රියැදුරු අසුනට යාබද අසුනේ මියගොස් සිටි බව පැහැදිලිවම දක්නට ඇතැයි එහිදී අනුර සේනානායක මහතාගෙන් විමසන විට ‘මම දැන් එතැනට ගිහින් ඇස් දෙකෙන්ම හැම දෙයක්ම දැකලයි ආවේ. මට වඩා ඔයාල මොනවද දන්නේ’ යනුවෙන් කියමින් වැරදි මත සමාජගත නොකරන්නැයි කෝපයෙන් පවසමින් පසුදිනට යෙදී තිබූ රණවිරු දිනය ගැන මාධ්‍ය හමුවේ තොරතුරු කියා තිබුණි.
නාරාහේන්පිට පොලීසියෙන් මූලික විමර්ශන පැවැත්වීමෙන් අනතුරුව මේ මරණය ගැන විමර්ශන අනුර සේනානායක මහතා විසින් පවරන්නේ කොළඹ අපරාධ කොට්ඨාසයටයි. එම විමර්ශන ද සිදු වන්නේ තාජුඩීන්ගේ මරණය රිය අනතුරක් ලෙස සලකාය. ඒ මේ මරණය ගැන සැක තිබියදීය.
තාජුඩීන්ගේ මරණය රිය අනතුරක් බවට නාරාහේන්පිට පොලීසියත්, කොළඹ අපරාධ කොට්ඨාසයත් සිය විමර්ශන ඔස්සේ පවත්වා තිබුණත් එය සැලසුම් සහගත ඝාතනයක් බව හෙළි කරන්නේ අපරාධ පරීක්ෂණ දෙපාර්තමේන්තුවට 2015 විමර්ශන භාරවීමත් සමඟිනි. යහපාලන ආණ්ඩුව බලයට පත්වීමත් සමඟ පෙර පැවති ආණ්ඩු සමයේදී සිදු වූ ආන්දෝලනාත්මක ඝාතන සහ අපරාධ රැසක විමර්ශන අපරාධ පරීක්ෂණ දෙපාර්තමේන්තුවට පවරනු ලැබීය.
ඒ අතර තාජුඩීන් ඝාතන පරීක්ෂණය ද විය. එහිදී එම අපරාධයට සම්බන්ධ බොහෝ තොරතුරු අපරාධ පරීක්ෂණ දෙපාර්තමේන්තුව විසින් හෙළි කර ගන්නේ තාජුඩීන්ගේ මරණය රිය අනතුරකින් සිදු වූ මරණයක් නොව, සැලසුම් සහගත ඝාතනයක් බව හෙළි කර ගනිමිනි. එම ඝාතනයට මුල්වූ කරුණු, ඊට සම්බන්ධ පුද්ගලයන් මෙන්ම එම අපරාධය රිය අනතුරක් ලෙස යට ගැසීමට සම්බන්ධ වූ පොලිස් නිලධාරීන් ගැන ද අපරාධ පරීක්ෂණ දෙපාරත්මේන්තුව විසින් තොරතුරු හෙළි කර ගත්තේය. නියෝජ්‍ය පොලිස්පති අනුර සේනානායක මහතා පවා අත්අඩංගුවට පත්වන්නේ ඒ අනුවයි. අධිකරණ වෛද්‍යවරයෙක් ද ඊට හවුල්වී තිබුණි. අත්අඩංගුවට ගැනීමට පෙර ඔහු හදිසියේම මිය ගියේය.
යහපාලන ආණ්ඩුව සමයේදී ඉතා සාර්ථකව පැවති තාජුඩීන් ඝාතන විමර්ශන නැවත ආණ්ඩු වෙනසත් සමඟ යට ගියේය. වත්මන් ආණ්ඩුව බලයට පත්වන විට ජනතාවට දුන් පොරොන්දු අතර තාජුඩීන් ඝාතනය විමර්ශනය ඇතුළු තවත් අපරාධ විමර්ශන ගණනාවක්ම නැවත ආරම්භ කර සැකකරුවන් නීතිය හමුවට ගෙන එන බව සඳහන් විය. ඒ අනුව වසා දමා තිබූ තාජුඩීන්ගේ ඝාතනය විමර්ශන ගොනුව ද අපරාධ පරීක්ෂණ දෙපාර්තමේන්තුව විසින් නැවත දිග හැරියේය. රිය අනතුරක් ලෙස පෙන්වමින් මේ අපරාධය යට ගැසීමට උත්සාහ දැරූ බවට චෝදනා එල්ල වූ අනුර සේනානායක පවා ඒ වන විට සිටියේ මිය ගොසිනි.
මේ තත්ත්වය මත අපරාධ පරීක්ෂණ දෙපාර්තමේන්තුවේ විශේෂ පොලිස් කණ්ඩායමක් විසින් දීර්ඝ ලෙස කරනු ලැබූ විමර්ශනයකදී අනාවරණය කර ගන්නේ එදා තාජුඩීන් ඝාතනය වීමට පෙර ඔහු ගමන් ගත් මෝටර් රථය පසුපස හඹා ගිය ජීප් රථයේ අනුර විදානගමගේ නොහොත් කජ්ජා නමැත්තා ද සිට ඇති බවයි. තහවුරු කෙරෙන සාක්ෂිය අපරාධ පරීක්ෂණ දෙපාර්තමේන්තුවේ විමර්ශන නිලධාරීන්ට ලැබෙන්නේ කජ්ජා ගේ බිරියගෙනි. ඒ වසර 10කට ආසන්න කාලයක් පුරා අපරාධ පරීක්ෂණ දෙපාර්තමේන්තු විමර්ශකයන්ට හඳුනා ගැනීමට නොහැකිව තිබූ වීඩියෝ දර්ශනයක සිටි පුද්ගලයා හඳුනා ගනිමිනි. ඒ් හැව්ලොක් උද්‍යානයේ පිහිටි සුපිරි වෙළෙඳසලක ආරක්ෂක කැමරාවක සටහන්වූ අපැහැදිලි මිනිස් රුවකි. අපරාධ පරීක්ෂණ දෙපාර්තමේන්තුව විසින් එකල මේ අපැහැදිලි රුව සහිත වීඩියෝව මෙන්ම ඡායාරූප ද මාධ්‍යට නිකුත් කරමින් හඳුනා ගැනීමට මහජන සහාය ඉල්ලා සිටියේය. එහෙත් ඔහුගේ බිරිය මෑතකදී අපරාධ පරීක්ෂණ දෙපාර්තමේන්තුවට පැමිණ එම වීඩියෝවේ සිටින්නේ සිය සැමියා බව පවසනතුරු කිසිවකුත් එම වීඩියෝව හඳුනා ගැනීමට ඉදිරිපත් වී නොතිබුණි.
මුල සිට ඒ සම්බන්ධයෙන් සැකයක් අපරාධ පරීක්ෂණ දෙපාර්තමේන්තුවේ විමර්ශකයන්ට පැවතියත් එය තහවුරු වීමත් සමඟ තාජුඩීන් ඝාතන විමර්ශන වේගවත් වූ බව පොලිස් තොරතුරු සඳහන් කළේය.
