දිවයිනේ ප්රදේශ කිහිපයකින් මෙනින්ජයිටීස් සැක සහිත රෝගීන් 237 දෙනෙකු වාර්තා වී ඇති බව වසංගත රෝග විද්යා අංශය පවසයි.
රෝගය ව්යාප්ත වීම වැළැක්වීම සඳහා පිරිසිදු පානීය ජලය භාවිත කිරීම සහ හැකි සෑම විටම උණුකර නිවාගත් ජලය පානය කරන ලෙස සෞඛ්ය අංශ ජනතාවගෙන් ඉල්ලීමක් කර ඇත.
මේ පිළිබඳ අදහස් දක්වමින් ප්රජා සෞඛ්ය විශේෂඥ වෛද්ය තුෂානි දාබරේරා මහත්මිය සඳහන් කළේ, මේ වනවිට වැඩි වශයෙන් වාර්තා වන්නේ වෛරස් ආසාදන හේතුවෙන් ඇතිවන මෙනින්ජයිටීස් රෝගීන් බවයි.
ඇය පැවසුවේ මෙම රෝගී තත්ත්වය මුලින්ම අප්රේල් 15 වැනිදා මාතර දිස්ත්රික්කයේ දෙණියාය ප්රදේශයෙන් හඳුනාගෙන ඇති අතර, පසුව රිකිල්ලගස්කඩ, මහනුවර, බදුල්ල, වැලිමඩ සහ දියතලාව යන ප්රදේශවලින්ද රෝගීන් වාර්තා වූ බවය.
වාර්තා වී ඇති රෝගීන් අතර බහුතරය පාසල් දරුවන් වන අතර, ඊයේ (31) පස්වරුව වනවිට රෝහල්ගතව ප්රතිකාර ලබමින් සිටියේ රෝගීන් 59 දෙනෙකු පමණක් බවත්, අනෙක් සියලු දෙනා සුවය ලබා නිවෙස් බලා ගොස් ඇති බවත් ඇය සඳහන් කළාය.
උණ, හිසරදය සහ වමනය මෙම රෝගයේ ප්රධාන රෝග ලක්ෂණ අතර වන අතර, වෛරස් මෙනින්ජයිටීස් රෝගය බොහෝවිට දින කිහිපයක් ඇතුළත සුව වන බවද ඇය පැවසුවාය.
මෙම තත්ත්වය සම්බන්ධයෙන් විමර්ශන සහ පාලන කටයුතු සඳහා විශේෂ කමිටු පත්කර ඇති අතර, අපිරිසිදු පානීය ජල මූලාශ්ර රෝග ව්යාප්තියට හේතු විය හැකි බැවින් සෞඛ්ය හා අධ්යාපන අමාත්යාංශ මගින් විශේෂ මාර්ගෝපදේශ නිකුත් කර තිබේ.
දරුවන්ගේ ආහාර එකිනෙකා අතර හුවමාරු නොකරන ලෙසත්, සෑම විටම පිරිසිදු හා උණුකර නිවාගත් ජලය භාවිත කරන ලෙසත් සෞඛ්ය අංශ ජනතාවට උපදෙස් ලබාදී ඇත.
